ബംഗളൂരു: കർണാടക മുഖ്യമന്ത്രി ആരെന്നതിൽ തീരുമാനം ഇന്നുണ്ടായേക്കില്ല. ഇക്കാര്യത്തിൽ ഡൽഹിയിലാകും തീരുമാനമുണ്ടാകുക എന്നാണ് വിവരം. മുഖ്യമന്ത്രി സ്ഥാനത്തിനായി ഡി.കെ. ശിവകുമാർ കരുനീക്കം ശക്തമാക്കിയതോടെയാണ് തീരുമാനം വൈകുന്നത്. കർണാടകയിൽ പുതിയ കോൺഗ്രസ് സർക്കാർ വ്യാഴാഴ്ച സത്യപ്രതിജ്ഞ ചെയ്ത് അധികാരമേൽക്കുമെന്നാണ് സൂചന. മുഖ്യമന്ത്രിയും മന്ത്രിമാരും അന്ന് തന്നെ സത്യപ്രതിജ്ഞ ചെയ്യും.
അതേസമയം, നിയമസഭ കക്ഷി യോഗത്തിൽ സമവായമുണ്ടാകില്ലെന്ന് ഉറപ്പായതോടെ ഹൈക്കമാൻഡ് മൂന്ന് നിരീക്ഷകരെ ചുമതലപ്പെടുത്തി. സുശീൽ കുമാർ ഷിൻഡെ, ജിതേന്ദ്ര സിംഗ്, ദീപക് ബാബറിയ എന്നിവരാണ് സമിതി അംഗങ്ങൾ. മൂവരും ഇന്ന് വൈകുന്നേരത്തോടെ ബംഗളൂരുവിലെത്തും.സമിതി അംഗങ്ങൾ എംഎൽഎമാരെ ഒറ്റയ്ക്കൊറ്റയ്ക്ക് കാണും. നിരീക്ഷകർ ഹൈക്കമാൻഡിന് വിശദമായ റിപ്പോർട്ട് നൽകിയശേഷം ഡൽഹിയിലായിരിക്കും തീരുമാനം പ്രഖ്യാപിക്കുക.
അതേസമയം, സിദ്ധരാമയ്യയുമായി തനിക്ക് ഭിന്നതയില്ലെന്ന് ഡി.കെ ശിവകുമാർ മാധ്യമങ്ങളോട് പറഞ്ഞു. തനിക്ക് സിദ്ധരാമയ്യയുമായി ഭിന്നതയുണ്ടെന്ന് ചിലർ പറഞ്ഞുപരത്തുന്നു. എന്നാൽ ഞങ്ങൾക്കിടയിൽ ഒരു ഭിന്നതയും ഇല്ല എന്നതാണ് സത്യമെന്ന് ഡി.കെ പറഞ്ഞു. മുഖ്യമന്ത്രി ആരാകണമെന്ന യോഗം നിലവിൽ ബംഗളൂരുവിലെ സ്വകാര്യ ഹോട്ടലിൽ നടക്കുകയാണ്. ഈ യോഗത്തിൽ ഇതുസംബന്ധിച്ചു തീരുമാനം എടുക്കുമെന്നു നേതൃത്വം നേരത്തെ വ്യക്തമാക്കിയിരുന്നു.
പാർട്ടി ദേശീയ അധ്യക്ഷൻ മല്ലികാർജുൻ ഖാർഗെ, സോണിയ ഗാന്ധി, രാഹുൽ ഗാന്ധി അക്കമുള്ളവർ സത്യപ്രതിജ്ഞയിൽ പങ്കെടുക്കും . സഖ്യകക്ഷികൾ ഉൾപ്പെടെയുള്ള പാർട്ടി നേതാക്കൾക്കും സത്യപ്രതിജ്ഞാ ചടങ്ങിൽ പങ്കെടുക്കാൻ ക്ഷണമുണ്ട്.
