കോഴിക്കോട്: നഗരത്തിൽ കഴിഞ്ഞ രാത്രി ബൈക്കിൽ സഞ്ചരിക്കുകയായിരുന്ന ദമ്പതികളെ ആക്രമിച്ച സംഭവത്തിൽ നാല് പേരെ നടക്കാവ് പോലീസ് കസ്റ്റഡിയിലെടുത്തു. ഇവരുടെ പേര് വിവരങ്ങൾ പോലീസ് പുറത്തുവിട്ടിട്ടില്ല. പ്രതികൾ സഞ്ചരിച്ച ഒരു ബൈക്കും പോലീസ് കസ്റ്റഡിയിലെടുത്തിട്ടുണ്ട്.
ആക്രമണത്തിനിരയായ ദമ്പതികൾ നിലവിൽ ആശുപത്രിയിൽ ചികിത്സയിലാണ്.കസ്റ്റഡിയിലെടുത്തവരെ തിരിച്ചറിയാൻ ദമ്പതികളോട് നടക്കാവ് സ്റ്റേഷനിലേക്ക് എത്താൻ പോലീസ് അറിയിച്ചിട്ടുണ്ട്. ഇവർ എത്തി അക്രമികളെ തിരിച്ചറിഞ്ഞ ശേഷമേ അറസ്റ്റ് നടപടികളിലേക്ക് പോലീസ് കടക്കൂ.
കോഴിക്കോട് നഗരമധ്യത്തിൽ ഞായറാഴ്ച രാത്രി 10.15ഓടെയാണ് ദമ്പതികൾക്ക് നേരെ ആക്രമണം നടന്നത്. ചെറുവണ്ണൂർ സ്വദേശി അശ്വിനെയും ഭാര്യ‌യെയുമാണ് രണ്ടു ബൈക്കുകളിൽ എത്തിയ അഞ്ചംഗ സംഘം ആക്രമിച്ചത്.
ഭാര്യയോട് മോശമായി പെരുമാറിയത് ചോദ്യം ചെയ്ത യുവാവിനെ അഞ്ചംഗ സംഘത്തിൽ ഒരാൾ ഹെൽമറ്റ് കൊണ്ട് അടിച്ചുവീഴ്ത്തുകയായിരുന്നു. പിന്നാലെ അക്രമികളുടെ വാഹന നമ്പർ അടക്കം നൽകി പോലീസിനെ സമീപിച്ചെങ്കിലും നടപടിയുണ്ടായില്ല.രാവിലെ സംഭവം മാധ്യമങ്ങളിൽ വാർത്തയായതോടെയാണ് പോലീസ് ദമ്പതികളുടെ മൊഴി പോലും രേഖപ്പെടുത്തിയത്.
