ചെന്നൈ : ഐശ്വര്യ രജനികാന്ത് സംവിധാനം ചെയ്യുന്ന പുതിയ ചിത്രം പൊളിറ്റിക്കൽ ത്രില്ലർ ‘ലാൽ സലാ’മിന്റെ ഫസ്റ്റ് ലുക്ക് പോസ്റ്റർ പുറത്തിറങ്ങി. രജനിക്കൊപ്പം വിഷ്ണു വിശാലും വിക്രാന്തും ‘ലാൽ സലാ’മിൽ പ്രധാന കഥാപാത്രങ്ങളെ അവതരിപ്പിക്കുന്നുണ്ട്. കൂടാതെ ജീവിത രാജശേഖറും ഒരു സുപ്രധാന വേഷം ചെയ്യുന്നുണ്ട്. ചിത്രത്തിന്റെ തിരക്കഥ രചിച്ചിരിക്കുന്നതും ഐശ്വര്യ തന്നെയാണ്.
തന്റെ അച്ഛനെ നായകനാക്കി ഒരുക്കുന്ന ചിത്രത്തിന്റെ പോസ്റ്റർ ഐശ്വര്യ തന്നെയാണ് സോഷ്യൽ മീഡിയയിൽ പങ്കുവെച്ചത്. ഇന്ത്യ ഗേറ്റിന്റെ മുൻപിലൂടെ നടന്ന് വരുന്ന രജനിയെ പ്രേക്ഷകർക്ക് പോസ്റ്ററിൽ കാണാം.
Honoured and blessed appa ! the entire team of #LalSalaam always needs your blessings! pic.twitter.com/XWwGligE8m
— Aishwarya Rajinikanth (@ash_rajinikanth) May 7, 2023
വലിയ ബഡ്ജറ്റിൽ ഒരുക്കുന്ന ചിത്രത്തിന്റെ ഫസ്റ്റ് ലുക്ക് പുറത്തുവന്നതോടെ ആരാധകരുടെ പ്രതീക്ഷകൾ ഉയർന്നു. ലൈക്ക പ്രൊഡക്ഷൻസിന്റെ ബാനറിൽ സുഭാസ്കരൻ ആണ് ചിത്രം നിർമ്മിക്കുന്നത്. എ ആർ റഹ്മാൻ സംഗീത സംവിധാനം നിർവഹിക്കുന്ന ചിത്രത്തിന് വിഷ്ണു രംഗസാമിയാണ് ഛായാഗ്രഹണം നിർവഹിക്കുന്നത്. പ്രവീൺ ഭാസ്കർ ആണ് എഡിറ്റിംഗ്.
അതേസമയം, രജനികാന്ത് നായകനായി എത്തുന്ന ‘ജയിലറി’ന്റെ ചിത്രീകരണം അവസാന ഘട്ടത്തിലാണ്. കഴിഞ്ഞ ദിവസം ഇറങ്ങിയ ടീസറിന് പ്രേക്ഷകർ മികച്ച സ്വീകാര്യതയാണ് നൽകിയത്. ഇന്ത്യയിലെ പല ഭാഷകളിലെ നിരവധി താരങ്ങൾ ഉള്ള ചിത്രമാണ് ‘ജയിലർ’. നെൽസൺ ദിലീപ് കുമാർ സംവിധാനം ചെയ്യുന്ന ചിത്രം സണ്‍ പിക്‌ചേഴ്‌സിന്റെ ബാനറില്‍ കലാനിധി മാരനാണ് നിര്‍മ്മിക്കുന്നത്.
